شاعری: محبت گمشدہ میری از فرحت عباس شاہ

**********************

مری دسترس میں تھی زندگی
میں نے تیری راہ پہ ڈال دی


مجھے ہر حسین و جمیل پر
ترے خال و خد کا تھا شائبہ


تجھے ڈھونڈ لائے گا ایک دن
مجھے اعتماد تھا درد پر


تری جستجو تو ہے جستجو
مرے حوصلے کا سوال ہے


یہی اک دعا ہے کہ اے خدا
مجھے اپنے غم میں شریک کر


فرحت عباس شاہ


**********************


اُس کے وعدے کی رات جانے کیوں
چاند تاریخ بھول جاتا ہے


ہم رُکے تھے ترے لیے لیکن
تو سفر ہی بدل گیا اپنا


عشق کی بات ہے تو پھر جاناں
دنیا داری کی بات رہنے دو


منزلیں بھی سراب ہوتی ہیں
راستے بھی فریب دیتے ہیں


بے سبب ہی گلہ کیا ورنہ
کون خود کو غلط سمجھتا ہے


فرحت عباس شاہ


**********************


ہماری زندگی کی ہر مسافت
تمہاری راہ پر لکھی ہوئی ہے


سمندر بادلوں سے پوچھتا ہے
پرندے کس طرف کو جا رہے ہیں


درختوں کے لیے اچھا نہیں ہے
مسافر جنگلوں میں بس رہے ہیں


اداسی روح کے اندر کہیں پر
تمہارا نام لکھ کے رکھ گئی ہے


محبت خواب کا بستر بچھا کر
بڑے آرام سے سوئی ہوئی ہے


تری بچھڑی ہوئی خوشبو کے سائے
مرے چاروں طرف پھیلے ہوئے ہیں


فرحت عباس شاہ


**********************


اپنی بے چین مزاجی کا گلہ کس سے کریں
ہر کوئی بھٹکا ہوا درد لیے پھرتا ہے


جب تری یاد مری ذات کا در کھولتی ہے
چاند مرجھا کے خیالوں میں اتر آتا ہے


درد دریا کے کسی ٹوٹے ہوئے پُل کی طرح
پھینک دیتا ہے اچانک ہی کہیں بیچ ہمیں


کون آ آ کے مری شام کے دروازے پر
دستکیں دیتا ہے ناراض ہوائوں کی طرح


ہم ترے بارے میں لکھ آتے ہیں جن پیڑوں پر
دیر تک کالی خزائوں میں گھرے رہتے ہیں


فرحت عباس شاہ


**********************


ایک دل ہے اور ہزاروں زخم ہیں
بھیڑ میں کُچلا ہوا ہے راہ رو


زرد ہیں آنسو کہ جیسے دیر سے
آنکھ کے پیچھے خزاں آباد ہو


اس نے حیرانی سے چوما آسماں
بن گیا ہے رات کے ماتھے پہ چاند


کیا ہوا ایسا جو اس کو دیکھ کر
چاند کے چہرے کی رنگت اڑ گئی


ہم نے تیرے ہاتھ پر دیکھا لہو
اور پھر اپنا قتل اپنے سر لیا


فرحت عباس شاہ


**********************


بات بے چینی کی جب ہوتی ہے
لوگ میری مثالیں دیتے ہیں


فرحت عباس شاہ


**********************


اب مرے دل کی بات کرتے ہو
اب مرے اختیار میں کب ہے


فرحت عباس شاہ


**********************


درد عجیب سمندر ہے
چاند بنا بے چین رہے


عشق ہتھیلی بھول آیا
آج دعا کی چوکھٹ پر


بے چینی کی بات نہ کر
دل کی عادت ٹھہری ہے


رستے میں آجاتے ہیں
دریا تیری یادوں کے


تجھ سے تیرا دکھ بانٹوں
تجھ سے اتنا پیار کروں


فرحت عباس شاہ


**********************


دکھ تو یہ ہے کہ اپنے ہی ہاتھوں
غیر محفوظ ہو گیا جیون


سیاہ دن اور سفید گلیوں میں
موت دیوانہ وار پھرتی ہے


ہم نے غم میں علاج ڈھونڈ لیا
ورنہ سب لا علاج بیٹھے ہیں


سوچ کی بھُر بھری زمینوں کو
اضطراب اور بھی لتاڑتا ہے


افراتفری میں جو ہوئے پیدا
کشمکش میں سکون ڈھونڈتے ہیں


فرحت عباس شاہ


**********************


عشق کی راہ پڑنے والوں کو
ہجر بے چین کر کے مارتا ہے


راہ بدلو کہ لوٹ کر ہی نہ آؤ
ہم ترے انتطار میں گم ہیں


اپنا اپنا نصیب ہوتا ہے
ہم بھرے شہر میں اکیلے ہیں


تم نے دل کا کہا تو پھر سُن لو
ہم نے بخشا تمہیں قیامت تک


تجھ پہ آئیں نہ مشکلیں ورنہ
تیرے حصے کی ہم اٹھا لیتے


فرحت عباس شاہ


**********************


اک اعتراض ہے مجھ پر زمانے والوں کا
میں اپنا آپ انہیں سونپ کیوں نہیں دیتا


فرحت عباس شاہ


**********************


مفلسی میں وہ دن بھی آئے ہیں
ہم نے اپنا ملال بیچ دیا


فرحت عباس شاہ


**********************


آدمی سے خداؤں تک جانے
کون کس کس کی دسترس میں ہے


ایک انداز ہے دکھوں کا بھی
دل کو دیوانہ وار آتے ہیں


ہم تو معذور تھے مگر تم بھی
دنیا داری نہ کر سکے پوری


ابتدا میں تو احتیاط کے ساتھ
عشق چھپ چھپ کے وار کرتا ہے


یہ ضروری نہیں کہ آنسو بھی
غم نصیبوں کا ساتھ دینے لگیں


فرحت عباس شاہ


**********************


دل یا بیماری دل
جیت کر کون رہا


امن کی قبروں پر
رنج و غم ناچتے ہیں


شب کو ہے سینے میں
چاند کا گھاؤ بہت


مارنے والے بتا
میں ترا کون ہوا


سچ کی پاداش میں ہم
دوست بھی چھوڑ چلے


فرحت عباس شاہ


**********************


دل آن پھنسا دل والوں میں
اب پھرتا ہے حیران بہت


جو دکھتا ہے وہ ہوتا بھی
کتنی معمولی حسرت ہے


اک تیرے غم میں موت تلک
ہم رفتہ رفتہ آ پہنچے


مجھے عارضی سکھ کی چاہ نہیں
مجھے اپنے دکھ میں رہنے دو


گھر کی اک چار دیواری میں
کتنی کچھ بھول بھلیّاں ہیں


فرحت عباس شاہ


**********************


مری زندگی بھی ہے گھومتی
ترے گرد باد کے سحر میں


مجھے سانس لینے دے کچھ ذرا
شبِ غم کے سینے پہ ہاتھ رکھ


مری برد باری بھی بے صدا
مرے پیچ و تاب بھی رائیگاں


ترے ہجر سے مری موت تک
کوئی وقت بچتا تو سوچتے


مجھے لگ رہا ہے یہیں کہیں
کوئی کھیلتا ہے نصیب سے


فرحت عباس شاہ


**********************


ترے لیے ہی تو آنکھیں بچائے پھرتا ہوں
وگرنہ آتا ہے جو کچھ نظر، نظر نہ رہے


جبین ڈھانپ لی اکثر یہ سوچ کر ہم نے
خدا کے بعد کئی لوگ بھی تو تاک میں ہیں


نئے سفر پہ نکلنا ہو تو عموماََ لوگ
پرانی راہ نوردی کی گرد جھاڑتے ہیں


تھکے ہوئے ہیں ہم ایسے کہ سانس مدھم ہے
جلے ہوئے ہیں کچھ اتنے کہ راکھ اڑتی ہے


ہم آگے بڑھتے بھلا کیسے بن ترے فرحت
ترے بغیر تو موسم ٹھہرنے لگتے ہیں


فرحت عباس شاہ


**********************


ہم مزاجی میں بھی نکل آئے
کس قدر اختلاف کے پہلو


دو گھڑی اس نے ساتھ کی خاطر
کر دیا عمر بھر اکیلا مجھے


اتنے آزاد ہیں کہ گھر میں بھی
سانس تک لے رہے ہیں آہستہ


قلبِ بیمار کی جو حالت تھی
ہم سے دیکھی نہیں گئی فرحت


تُو تو معصوم ہے تجھے کیا علم
لوگ معصومیت سے کھیلتے ہیں


فرحت عباس شاہ


**********************


ہم درد کے ماروں کی
راتیں بھی نہیں اپنی


پیاسے ہیں تو پیاسے ہیں
دریا ہو کہ صحرا ہو


جب چاہو پلٹ آنا
ہم راہ پہ بیٹھے ہیں


اک روح ہے مال اپنا
اک زخم جدائی ہے


ہم روز تمنا کے
صحرا سے گزرتے ہیں


فرحت عباس شاہ


**********************


یاد آئی تِرے لہجے کی بیابانی ہمیں
آگئے اجڑی ہوئی آنکھ میں آنسو کتنے


تیری آواز کی پرچھائیں نے زندہ رکھا
دل میں ورنہ وہ خموشی تھی کہ مر ہی جاتے


میری تنہائی کے بے گورو کفن لاشے پر
حسرتیں درد بھرے بین کیا کرتی ہیں


ہر کسی رُت لا الگ ردّ عمل ہوتا ہے
ہم نے بارش میں سلگتی ہوئی جاں دیکھی ہے


سوچ میں فاصلے در آئیں تو پھر چاہت بھی
پاس لے آنے میں ہوجاتی ہے ناکام بہت


فرحت عباس شاہ


**********************


ہجر اپنی روش پہ چلتا رہا
بے قراری نے گھر کیا دل میں


فرحت عباس شاہ


**********************


آج کل کون نہیں ہے شامل
زندگانی کے خریداروں میں


فرحت عباس شاہ


**********************


اپنے پیروں تلے بھی غور کرو
آسمانوں کی بات کرتے ہو


وہ تو اچھا ہوا کہ راہ گزر
آپ ہی آپ ساتھ چلتی رہی


درد بھی صاحبِ نظر ہے اور
ہر کسی کو ہوا نہیں کرتا


جنگلوں میں بھی گھر نہیں ممکن
شہر میں بھی ہیں وحشتیں آباد


دیکھا جائے تو آج کل زیادہ
آدمی آدمی سے ڈرتا ہے


فرحت عباس شاہ


**********************


دل کا عالم کیا کہیے
رات، سمندر، ویرانی


عشق محبت کا دریا
ایک کنارہ وہ بھی دور


کشتی لہروں کے بس میں
جیون بے پتوار ہوا


اس نے لکھا ہے خط میں
ہجر معاف نہیں کرتا


جیسے بھی حالات ہوئے
ہم نے دل کی مانی ہے


فرحت عباس شاہ


**********************


وہ کہیں راستہ بھٹک جائے، یہ تو ممکن نہ تھا مگر پھر بھی
تم چراغوں کی بات کرتے ہو، ہم نے دیوار و در جلا رکھے


تم سمجھتے ہو آفتاب ڈھلے، شام دیوار و در پہ ڈھلتی ہے
مجھ سے پوچھو تو انتظار کا غم، دل کے آنگن میں پھیل جاتا ہے


ایک بے چینی روز پوچھتی ہے، کوئی دستِ شفا بھی ہے کہ نہیں
ہم اسے یونہی بے تُکے ہنس ہنس، باتوں باتوں میں تال دیتے ہیں


ہم تری رہگزر تھے اور جاناں، تیرے قدموں کے انتظار میں تھے
سوچتے تھے کہ راستوں کے بھی، اپنے اپنے نصیب ہوتے ہیں


اس ہماری زمیں کے سینے پر، کیا خبر کیسے کیسے جنگل تھے
وحشتیں اس طرح ہوئیں آباد، بستیاں کھا گئیں درختوں کو


فرحت عباس شاہ


**********************


خوشی مل جائے بھی تو دل
کی ویرانی نہیں جاتی


تمنائیں سلامت ہوں
مسافت تھم نہیں سکتی


کبھی ساون میں بھی آؤ
تجھے صحرا دکھائیں گے


ہماری چشمِ پُر نم کا
سمندر ساتھ دیتے ہیں


قیامت اور کیا ہوگی
دلوں کے روگ سے بڑھ کر


کوئی بھی ہم سے ملتا ہے
تو تیری بات کرتے ہیں


فرحت عباس شاہ


**********************


سفر سفر تری خواہش قدم قدم ترا غم
نگر نگر تری بستی گلی گلی ترا در


درونِ ذات، برونِ جہانِ جاں ترا دَم
قفس قفس مِرے خواب و خیال، جاہ و جلال


ہوا ہوا مری رنگت بہ عجزِ عاجزِ من
کُجا کُجا تِری ہیبت بہ دشت و کوہ و دمن


زہِ نصیب غلامی نصیب ہو جائے
کرم ترا کبھی ہو جائے تو بھرم ہی بھرم


فرحت عباس شاہ


**********************


دنیا کی دیکھا دیکھی
چال چلن تبدیل ہوا


عشق عدالت میں فرحت
درد وکیل کیا ہم نے


اس کے دل کا کیا معلوم
جس کی آنکھیں میلی ہوں


دل ہر روز محبت کے
نام کی مالا جپتا ہے


تیری باتیں تُو جانے
ہم تو الف لکیرے ہیں


فرحت عباس شاہ


**********************


نیند کا میرے ساتھ عدہ تھا
تیرے سپنے دکھائے گی مجھ کو


فرحت عباس شاہ


**********************


ہم نے ہو کر بلند دیکھا ہے
آدمیت بھی ایک فیشن ہے


فرحت عباس شاہ


**********************


ساحرانِ جمال سے کہیے
ہم طلسمِ سوال میں گم ہیں


فرحت عباس شاہ


**********************


سفر مقصود تھا خود آگہی کا
ریاضت درد کی کرتا رہا ہوں


کوئی جنگل تھا جس میں شام ڈھلتے
گزر گاہیں ہمیشہ بین کرتیں


جو سنگِ میل آتا تھا نظر بھی
بہت مبہم ہوا کرتا تھا اکثر


دیارِ غیر سے بڑھ کر تھا مجھ کو
مرا اپنا جہانِ ذات فرحت


میں نامعلوم کی بے سمتیوں میں
اُلجھتا جا رہا تھا رفہ رفتہ


بہت تاریکیاں پھیلی تھیں پھر بھی
کہیں کوئی دیا بھی جل رہا تھا


نیا رستہ کوئی ملتا تو اس پر
تمہارے نام کی تختی بھی ہوتی


میں اپنے آپ کو پانے کی خاطر
تمہاری کھوج میں نکلا ہوا ہوں


فرحت عباس شاہ


**********************


ہماری بے بسی تھی صرف آدھا جی سکے ورنہ
محبت کے لیے اک زندگی ہم اور لے آتے


یہ جیون تو کبھی کا کھل کے کھیلا جا چکا اور اب
تماشائی بنے آخر تلک میلے میں بیٹھے ہیں


محبت ہے اگر پیاسی تو کچھ دریا بھی ایسے ہیں
جنہیں ہم دیکھ بھی لیں تو بہت تسکین ملتی ہے


کبھی جب چاندنی شب میں ہم اس کے کھوج میں نکلے
ہوا اکثر کہ ایسے میں نظر واپس نہیں آئی


کسی کو یوں اچانک دیکھ لینے سے ہے وابستہ
وہ لرزش جو نگاہوں سے کہیں دل میں اترتی ہے


فرحت عباس شاہ


**********************


ہوا رو رو کے کہتی ہے
تم ایسے دشت کیوں کر ہو


اور اب تو ہم سے ملنے کو
جدائی بھی نہیں آتی


ہمیں آ کر منا لینا
کسی بھی شام سے پہلے


اداسی پھیل جاتی ہے
تمہارے نام سے پہلے


ہم اپنے حصے کی خوشیاں
تمہارے نام کرتے ہیں


کوئی کتنا اکیلا ہے
تمناؤں کے میلے میں


دلوں کی بات ہے ورنہ
زمانہ خوبصورت ہے


فرحت عباس شاہ


**********************


آئے تھے بہت آگ کے دریا سے گزرنے
اس دن سے کئی شہر کنارے پہ ہیں آباد


ہم تیرے لیے خون کے دریا سے گزر آئے
گو خون بھی اپنا تھا گزر گاہ بھی اپنی


اک بیتے ہوئے دکھ کا سرا تھام کے اکثر
اس دل کی طرف کھینچتی رہتی ہے جدائی


نکلے تھے محلّے سے پتنگوں کو پکڑنے
وہ دن ہے کہ ہم آج تلک گھر نہیں لوٹے


ساون کے مہینے کی تو بس ساکھ بنی ہے
بادل ہوں تو برسات بھلا کب نہیں ہوتی


فرحت عباس شاہ


**********************


بسا لیا ہے اسے میں نے اپنی آنکھوں میں
وہ دیکھ لے گا اُتر کر سمندروں میں بھی


فرحت عباس شاہ


**********************


میں اپنے آپ سے آغاز کر کے آپ تلک
پہنچ تو جاؤں مگر "میں" کی موت ہے اس میں


فرحت عباس شاہ


**********************


میں اکثر آوازیں دینے لگتا ہوں
اپنے ادر اک گھر کے دروازے پر


کان تو ہوتے تھے پہلے دیواروں کے
اب دروازوں کی بھی آنکھیں ہوتی ہیں


تم نے دیکھا سورج ساتھ نہیں دیتا
ڈھلتے ڈھلتے ڈھل جاتا ہے شام ڈھلے


پہلے جیسا دم خم آج کہاں یارو
ہم سے تو اولاد نے بازو چھین لیے


ہم نے اپنے سارے رشتوں ناطوں کی
خالص جذبوں پر بنیادیں رکھی ہیں


فرحت عباس شاہ


**********************


آنکھوں کی قسم ہم نے تجھے دل میں بسایا
راتوں کی قسم ہم نے عبادت تری کی ہے


اظہار کی آزادی سمجھتے رہے ہم تو
بولے تو زباں کیل کے رکھ دی گئی اپنی


پیڑوں پہ سجانے لگے انسان ثقافت
سڑکوں پہ اتر آئے ہیں حیران پرندے


آپس میں بہت گہرا ہے ان تینوں کا رشتہ
جب موت کراہے گی تو تڑپیں گے دل و جاں


ویران گزر گاہوں کا عالم تو ذرا دیکھ
تیروں کی طرح کیسے اتر جاتی ہیں دل میں


فرحت عباس شاہ


**********************


یہ بھی ممکن ہے کہ اس سہمے ہوئے
وقت کے پار خدا رہتا ہو


فرحت عباس شاہ


**********************


دھڑکن تیری آنکھوں میں آنسو لے آئے
دل کی لے میں شاید اتنا درد نہیں


ہم دیوانے ویرانوں میں رہ لیں گے
اور ویرانے بھی کچھ زیادہ دور نہیں


رفتہ رفتہ عادت بھی ہو جائے گی
ہوتے ہوتے درد بھی کم ہو جائے گا


دھیرے دھیرے گھوم آئیں گے دنیا بھی
ہم اپنے آوارہ پن کے قائل ہیں


ایک گلہ ہے ان کے اور ہمارے بیچ
یوں لگتا ہے ساتھ سمندر حائل ہیں


فرحت عباس شاہ


**********************


بوسہ دے گا کون بھلا
سورج کی پیشانی پر


کم ہمت انسانوں کا
مشکل ساتھ نہیں دیتی


اک دریا اک صحرا ہے
تیرے گھر کے رستے میں


آؤ بھوک ہی بیچ آئیں
گھر میں رکھا ہی کیا ہے


تیرے بعد ان آنکھوں میں
بارش ہوتی رہتی ہے


فرحت عباس شاہ


**********************


سوال یہ ہے کہ ہر راستہ کٹھن ہے بہت
جواب یہ ہے کہ کٹھنائیاں مسافت ہیں


فرحت عباس شاہ


**********************


عشق تیرے مسافروں پہ سدا
زندگی عمر بھر عذاب رہی


فرحت عباس شاہ


**********************


نیند کا میرے ساتھ وعدہ تھا
تیرے سپنے دکھائے گی مجھ کو


رات نے بند کر دیے کب سے
استراحت کے سارے دروازے


دل نے عادت عجیب اپنا لی
آ کے سر میں دھڑکنے لگتا ہے


ہجر اک آدمی ہے دشمن سا
چین کا ایک پل نہیں دیتا


ہم سا دیوانہ کوئی کیا ہو گا
دھوپ ہمراہ لے کے پھرتے ہیں


فرحت عباس شاہ


**********************


سوگواروں کی ضرورت ہے اگر
آؤ بازار سے لے آتے ہیں


ایک میّت ہی تو دفنانا ہے
تھوڑے پیسوں میں نپٹ جائے گا


گر جنازے کا بھرم رکھنا ہے
لوگ مل جائیں گے رونے والے


شامیانوں کی ضرورت کیا ہے
بیٹھ جائیں گے کہیں غم کے تلے


اس کی تعبیر بتا کیا ہوگی
تو مرے خواب میں چپ بیٹھا تھا


فرحت عباس شاہ


**********************


بیتے ہیں عجب کشمکشِ ذات میں رستے
پڑتا تھا قدم اور تو دل اور کہیں پر


ممکن ہی نہیں تھا کہ تری راہ سے ہٹتے
بس قافلہ والوں سے جدا ہوتے رہے ہیں


ہم اہلِ جنوں رکھتے ہیں کچھ اور عقیدہ
ہم عشق سمجھتے ہیں عبادات سے افضل


ہاں یہ ہے کہ ہم راہِ رگِ جاں پہ مسلسل
چلتے رہے اور درد سے آگے نکل آئے


ہستی کے بھی کچھ اپنے مسائل تھے مگر ہم
جس عالمِ لا ذات میں تھے اور ہی کچھ تھا


فرحت عباس شاہ


**********************


ترے خیال میں کھویا ہوا زمانہ ہوں
یہ کائنات عجب کائنات میں گُم ہے


فرحت عباس شاہ


**********************


ایک محبت اور کریں
ایک جدائی اور سہی


فرحت عباس شاہ


**********************


آزمائش نہیں کرم کہیے
وہ کچھ ایسے ہی یاد کرتا ہے


ایک جیسا سمے ہو تو ہم بھی
اُسا نرالے کو بھول جاتے ہیں


پھول جڑتے ہیں اس کے ہونٹوں سے
اس کی آنکھیں کلام کرتی ہیں


چال چلتا ہے تو صبا تھم کے
احتراماََ سلام کرتی ہے


اس کی اک اک ادا مری توبہ
منظروں کو سہانا پن بخشے


فرحت عباس شاہ


**********************


سیاہ دن اور سفید گلیوں میں
موت دیوانہ وار پھرتی ہے


فرحت عباس شاہ


**********************


انگلی کوئی کس طرح اٹھاتا کبھی تم پر
ہم سینہ سپر منتظرِ وقتِ جدل تھے


کہنے کو تو اک عالمِ احساس ہے اندر
ممکن ہے کبھی شدتِ غم بھی نہ ہو محسوس


ممکن تھا ترے پیار میں ہم جاں سے گزرتے
کچھ تم ہی میں وہ شوقِ پذیرائی نہیں تھا


راتوں کا یہ عالم ہے کہ خاموشی سے اکثر
بستر پہ پری رہتی ہیں دُکھ تک نہیں دیتیں


مانوس نہ تھے ایسے رویّوں سے دل و جاں
تم آئے تو سیکھا ہے چلن اہلِ جہاں کا


فرحت عباس شاہ


**********************


مرا قافلہ سا چلا تھا خواہشِ وصل کا جو تری طرف
کبھی راستوں میں بھٹک گئے کبھی جنگلوں میں اُلجھ گئے


اسے شک ہوا کہ میں ڈھونڈ لوں گا اسے کسی نہ کسی طرح
تو وہ قریہ قریہ روش روش پہ ذرا ذرا سا بکھر گیا


میں ترے لیے کسی اور ہجر کا لے کے آؤں گا سانحہ
جسے جھیل کر ترا آسماں بھی تڑپ اٹھے گا عذاب سے


وہ جو رنج بھیجے تھے میں نے تیرے لیے ہواؤں کے دوش پر
وہ تو چند لمحوں کے بعد میری ہی سمت لوٹ کے آ گئے


میں ذرا ذرا سا کہیں کہیں سے بدل گیا ہوں ترے لیے
مرے پاس پہلے سا غم نہیں مرے پاس ویسی خوشی نہیں


فرحت عباس شاہ


**********************


سوچ سمجھ کر باتیں کرنے والے لوگ
ڈرے ہوئے ہوتے ہیں شاید اندر سے


اندر بھی تو لاکھوں بھول بھلیّاں ہیں
کیسے کیسے راہی رستہ بھول گئے


وقت تھا حالانکہ جیون کے ہاتھوں میں
ہم نے وقت کے ہاتھوں جیون ہار دیا


غیر مسلح کرتے جاتے ہو ہم کو
یارو کوئی نیک ارادہ رکھتے ہو


آبادی کی خواہش پختہ ہو تو پھر
ویرانے میں بستی بسنے لگتی ہے


فرحت عباس شاہ


**********************


فیصلے کرنے لگے ہو میرے
تم مرے کون ہوا کرتے ہو


اس سے امید لگا بیٹھے ہیں
جس کو خود سے کوئی امید نہیں


نامرادی وہ شجر ہوتی ہے
جس میں بس چھاؤں کا شک رہتا ہے


احتراماََ تری بربادی میں
ہم نے کچھ خود سے اضافہ نہ کیا


ہم نے پلکوں سے ترا نام لکھا
اپنی تنہائی کے دروازوں پر


فرحت عباس شاہ


**********************


کچھ بھی تو سیکھنے نہیں دیتا
کتنا استاد ہے زمانہ بھی


تُو مجھے بے سبب ہی ملتا تھا
بات تو میرے دل میں تھی کوئی


زندگی خود سے خود کُشی تک ہے
درمیاں کرب ناک عالم ہے


اس نے لکھا نہیں ہے کچھ خط میں
اس کی یہ بات بھی سمجھتا ہوں


ہجر کا اپنا راز ہوتا ہے
وصل کے انکشاف سے بڑھ کر


فرحت عباس شاہ


**********************


بڑے رنگ ہیں ترے جابجا
تری ہر طرف ہیں نشانیاں


مری آنکھ پر بھی ہے منحصر
مرے قلب کا بھی نصیب ہے


یہ جو فاصلے ہیں ناں درمیاں
یہ ذرا سے راز کی بات ہے


میں اکیلا تو نہیں رہ رہا
کئی اجنبی ہیں پڑوس میں


کوئی ایسی بھی نہیں بے حسی
مرا اضطراب گواہ ہے


تو کہ اپنے آپ پہ منکشف
میں کہ اپنے آپ پہ راز ہوں


فرحت عباس شاہ


**********************


کنواری رات اکثر سوچتی ہے
دنوں کے ہاتھ پیلے کیوں ہوئے ہیں


فرحت عباس شاہ


**********************


دل سے باغی پہ تجھ سے پیار کے بعد
اختیار اور بھی ہوا کم ہے


فرحت عباس شاہ


**********************


دل میں اک دیپ جلا غم کا تو
روشنی دور تلک پھیل گئی


ایک دوجے کی نفی ہے جس میں
اس طرح کی بھی ہے دنیا آباد


یہ بھی ممکن ہے کہ اس سہمے ہوئے
وقت کے پار خدا رہتا ہو


ہم محبت کو بنا کر زینہ
رب کے نزدیک پہنچ جاتے ہیں


پیڑ بھی لوگ ہوا کرتے ہیں
سبز رکھو تو دعا دیتے ہیں


فرحت عباس شاہ


**********************


سمندر بادلوں سے پوچھتا ہے
پرندے کس طرف کو جا رہے ہیں


فرحت عباس شاہ


**********************


لوگوں سے تغافل پہ تو ماتم ہوا معمول
اور میری تباہی پہ بھی آنکھیں نہیں بھیگیں


شاید تو کبھی پیاسا مری سمت پلٹ آئے
آنکھوں میں لیے پھرتا ہوں دریا تری خاطر


تھی آپ کو بھی ہم سے محبت تہہ دل سے
اک وہم کے تابوت میں زندہ ہیں ابھی تک


تھی رات کی تنہائی میں شہنائی کی آواز
ہم سمجھے کہ کرلایا ہے اجڑا ہوا کوئی


سب شہر مخالف تھا مگر پھر بھی مری جاں
ہم نے تری آواز پہ لبّیک کہا تھا


فرحت عباس شاہ


**********************


کمال ہجر بھی دیکھا ہے وصل بھی دیکھا
ہمیں لگا کہ کوئی تیسرا بھی عالم ہے


یہ تیرا وصف سہی بات کو چھپا جانا
یہ میرا عیب سہی دل میں کچھ نہیں رکھتا


شبِ فراق ترے ناز بھی اٹھا لیں گے
مگر ابھی اسے خود سے الگ بھی تو کر لیں


تمہارے شہر سے آتی ہوئی ہواؤں میں
نہ جانے کیا تھا کہ سانسیں سلگ سلگ اٹھّیں


خدا سے لینے گئے تھے وصال تیرے لیے
تو قیمتاََ اسے سارے وصال دینے پڑے


فرحت عباس شاہ


**********************


زندانوں کی بات نہیں
لوگ ہوا کے قیدی ہیں


جنگل بھی خاموش ہوئے
شاید چپ کا موسم ہے


کتنی مضبوطی سے لوگ
خود کو جکڑے بیٹھے ہیں


اس کی آنکھ کی ویرانی
میرے دل تک آ پہنچی


ویرانوں میں جگہ جگہ
شہروں کی تصویریں ہیں


فرحت عباس شاہ


**********************


ہم نے دل کی مثال یوں دی تھی
پتھروں کا تھا ذکر عام وہاں


فرحت عباس شاہ


**********************


میں ہرا بھرا تھا شجر کوئی
ترا انتظار جلا گیا


فرحت عباس شاہ


**********************


مشکلوں سے سلائے تھے ہم نے
تم ملے ہو تو درد جاگ اٹھے


روح کا اضطراب کیا کم ہو
آرزو میں ہے اِرتعاش بہت


اختیارات کا مُعاملہ ہے
تم سے شاید نہ نبھ سکے میری


تیری عظمت بھی ہے اسی میں کہ تم
مجھ کو مری انا سے جینے دو


عشرتیں اپنی ہست سے ہیں سبھی
قطرہ قطرہ ہے دریا دریا ہے


فرحت عباس شاہ


**********************


مجھے تجھ سے کوئی گلہ نہیں
شبِ انتظار کا خوف ہے


اگراپنی اپنی نطر ہے تو
مجھے اپنے درد پہ زعم ہے


ترے ارد گرد ہیں گھومتے
مری زندگی کے معاملے


تجھے ڈھونڈ لینے کے شوق میں
میں نے اپنا آپ گنوا دیا


مری عمر تھی کوئی رات جو
تری آرزو میں گزر گئی


فرحت عباس شاہ


**********************


ذات کی کوٹھڑی میں داخل ہو
اور پھر دیکھ کائنات ہے کیا


کچھ بھی تو ذہن میں نہیں ہوتا
رات کٹتی ہے پھر بھی مشکل سے


یہ مرے خیال کی ریاضت ہے
جب بھی سوچا تو چھُو لیا تجھ کو


اس قدر جذب کر چکا ہوں اسے
میری سانسوں میں اس کی خوشبو ہے


ہونٹ تو میرے ہلتے رہتے ہیں
لیکن آواز اس کی آتی ہے


فرحت عباس شاہ


**********************


بڑا عام فہم تھا عجز میرے علوم کا
مرے عشق میں جو غرور تھا بڑا دور تھا


مرا اپنا آپ ڈگر ہے فکر ا مختلف
یہ ا لگ کہ کوئی چلے تو اس کو پتہ چلے


کسی لال رنگ کی شام میں ترے نام سے
میں شروع کروں گا دلوں کے قتل کی داستاں


مری انگلیوں کی خلش کے خوف سے ناگہاں
شبِ غم نے اپنی تمام راکھ سمیٹ لی


ترا درد بھی کوئی درد تھا کہ پڑا رہا
تری قتل گاہ کی ریت پر بڑی دیر تک


فرحت عباس شاہ


**********************


کمالِ ہجر بھی دیکھا ہے وصل بھی دیکھا
مجھے لگا ہے کوئی تیسرا بھی عالم ہے


فرحت عباس شاہ


**********************


تو خیال کی کسی اور صورتِ حال میں
مجھے اپنے جیسا لگا تو درد کا در کھلا


بڑی دھوپ تھی کسی ملنے والے کے صحن میں
مجھے سائبان بنا کے لوگ چلے گئے


مجھے حسن و عشق میں باندھ کر مری روح نے
کہیں آنے جانے کا چھوڑ کر ہی نہیں دیا


وہ ترا جمال کہ شرمسار ہے حُسن بھی
وہ مرا کمالِ نظر کہ کچھ بھی نہیں رہا


کوئی احترام بھی تھا کہیں پسِ دشمنی
میں اسی لیے کبھی کھُل کے وار نہ کر سکا


فرحت عباس شاہ


**********************


رات کی مہرباں سہیلی بھی
اب تو کم کم ہی درد بانٹتی ہے


فرحت عباس شاہ


**********************


اس نے سکھ پر لگائی پابندی
ہم نے دکھ کے کواڑ کھول لیے


فرحت عباس شاہ


**********************


تمہارے نام پہ ہم نے ہزاروں مرتبہ فرحت
خود اپنے آپ کو دھکے دیے ہیں ہار کے دل سے


محبت میں مقاماتِ جنوں ایسے بھی آتے ہیں
سماعت کو ہر اک لہجے پہ تیرا شک گزرتا ہے


خدا جانے وہ کیسی رات تھی جب ہم نہیں روئے
مگر دیوار و در سے جس طرح آنسو ٹپکتے تھے


قیامت کا بھی اک انداز ہے جب بھی گزرتی ہے
سنبھلنے میں دلوں کی زندگی لگ جایا کرتی ہے


مجھے تم سے محبت تھی مگر کچھ آجکل جاناں
مرے حالات ایسے ہیں کہ میں کچھ کہہ نہیں سکتا


کسی کا اس میں کیا تھا جو سبھی سے کہتے پھرتے ہم
ہمارا درد تھا ہم نے چھپا کے رکھ لیا سب سے


یہی اک رات ایسی ہے تکا کرتی تھی جو ورنہ
ہم اپنے اشک تکیے میں چھپا کر سو گئے اکثر


فرحت عباس شاہ


**********************


کوئی ہے جو اب بھی بلا رہ ہے مجھے کہیں
کوئی ہے حصار کہ جس کی قید میں ہوں ابھی


جو نگر ہے اس کو سنبھال رکھنا بہت کہیں
جو عدو ہے اس کی نگاہ پہلے ہی ایسی ہے


بڑے دن گزار لیے جہان کے پیڑ پر
کسی شام شاخ سے توٹ جائے گی زندگی


میں خیال و خواب کی کشمکش کا اسیر تھا
مجھے کھینچ کھانچ کے عشق لایا ہے راہ پر


مرے انکسار کو کمتری نہ سمجھ کہ یہ
مرے اپنے آپ پہ اعتماد کی دین ہے


فرحت عباس شاہ


**********************


مجھے لگتا ہے یہ دل بھی پرایا مال ہو جیسے
کہ جب بھی جس کا جی چاہے بہت پامال کرتا ہے


اداسی بڑھ گئی ہے اس قدر تومت کہیں نکلو
نہ جانے کون سی رو کس طرف کتنا بہا لے جائے


سفر میں پر بھی اپنے ساتھ رکھی لیں تو مناسب ہے
کسے معلوم رستے میں کہاں دیوار آ جائے


میں پیشانی پہ وھشت بھر مقدر لے کے پھرتا ہوں
مرا تو حوصلہ ہے اور زمانہ ڈر سمجھتا ہے


مری دیوانگی پہ اس قدر حیران ہوتے ہو
مرا نقصان تو دیکھو محبت گمشدہ میری


فرحت عباس شاہ

**********************
اختتام