فہمی بدایونی
پوچھ لیتے وہ بس مزاج مرا
کتنا آسان تھا علاج مرا
__________________________
پریشاں ہے وہ جھوٹا عشق کر کے
وفا کرنے کی نوبت آ گئی ہے
__________________________
میں نے اس کی طرف سے خط لکھا
اور اپنے پتے پہ بھیج دیا
__________________________
خوشی سے کانپ رہی تھیں یہ انگلیاں اتنی
ڈلیٹ ہو گیا اک شخص سیو کرنے میں
_______________________
ٹہلتے پھر رہے ہیں سارے گھر میں
تری خالی جگہ کو بھر رہے ہیں
_____________________________________________________
کٹی ہے عمر بس یہ سوچنے میں
مرے بارے میں وہ کیا سوچتا ہے
__________________________________
میں چپ رہتا ہوں اتنا بول کر بھی
تو چپ رہ کر بھی کتنا بولتا ہے
_________________________________
مجھ پہ ہو کر گزر گئی دنیا
میں تری راہ سے ہٹا ہی نہیں
________________________________
آج پیوند کی ضرورت ہے
یہ سزا ہے رفو نہ کرنے کی
_________________________________
بدن کا ذکر باطل ہے تو آؤ
بنا سر پیر کی باتیں کریں گے
________________________________
آپ تشریف لائے تھے اک روز
دوسرے روز اعتبار ہوا
_________________________________
لیلیٰ گھر میں سلائی کرنے لگی
قیس دلی میں کام کرنے لگا
_____________________________________________________
جو کہا وہ نہیں کیا اس نے
وہ کیا جو نہیں کہا اس نے
_______________________________
پھولوں کو سرخی دینے میں
پتے پیلے ہو جاتے ہیں
________________________________
اسے لے کر جو گاڑی جا چکی ہے
میں شاید اس کے نیچے آ رہا ہوں
_________________________________
نگاہیں کرتی رہ جاتی ہیں ہجے
وو جب چہرہ سے املا بولتا ہے
_________________________________
توڑے جاتے ہیں جو شیشے
وہ نوکیلے ہو جاتے ہیں
_______________________________
اچھے خاصے قفس میں رہتے تھے
جانے کیوں آسماں دکھائی دیا
_________________________________
شہسواروں نے روشنی مانگی
میں نے بیساکھیاں جلا ڈالیں
__________________________________
سخت مشکل تھا امتحان غزل
میرؔ کی نقل کر کے پاس ہوئے
__________________پھر اسی قبر کے برابر سے
زندہ رہنے کا راستہ نکلا
_____________مرے سائے میں اس کا نقش پا ہے
بڑا احسان مجھ پر دھوپ کا ہے
__________________________________
یار تم کو کہاں کہاں ڈھونڈا
جاؤ تم سے میں بولتا ہی نہیں
_____________________________________________________
کہیں کوئی کماں تانے ہوئے ہے
کبوتر آڑے ترچھے اڑ رہے ہیں
_____________________________________________________
ابھی چمکے نہیں غالبؔ کے جوتے
ابھی نقاد پالش کر رہے ہیں
_______________________________
چھت کا حال بتا دیتا ہے
پرنالے سے گرتا پانی
________________ترے موزے یہیں پر رہ گئے ہیں
میں ان سے اپنے دستانے بنا لوں
________________________________
میں تو رہتا ہوں دشت میں مصروف
قیس کرتا ہے کام کاج مرا
__________________________________
تری تصویر، پنکھا، میز، مفلر
مرے کمرے میں گردش کر رہے ہیں
**********************
کچھ نہ کچھ بولتے رہو ہم سے
چپ رہو گے تو لوگ سن لیں گے
